ភ្នំពេញ, នៅវេលាម៉ោង ៣:០០នាទី នៅទីស្តីការក្រសួងកសិកម្មរុក្ខាប្រមាញ់ និងនេសាទ បានរៀបចំកម្មវិធីសំណេះសំណាល និងជូនដំណើរនិស្សិតវិទ្យាស្ថានជាតិកសិកម្មព្រែកលៀបចំនួន២០០នាក់ ត្រូវធ្វើកម្មសិក្សារយៈពេល១១ខែ នៅប្រទេសអ៊ីស្រាអែល ក្រោមអធិបតីដ៍ខ្ពង់ខ្ពស់របស់ ឯកឧត្តម
វេង សាខុន រដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទ។
ក្នុងឪកាសនោះ ឯកឧត្តមបណ្ឌិត ធន់ វឌ្ឍនា នាយកវិទ្យាស្ថានជាតិកសិកម្មព្រែកលៀប បានធ្វើ សេចក្តីរាយាការណ៍ជូនដល់ឯកឧត្តមរដ្ឋមន្រ្តី និងឯកឧត្តមគណៈប្រតិភូទាំងអស់ អំពីវឌ្ឍនភាពរបស់វិទ្យាស្ថានជាតិកសិកម្មព្រែកលៀប។ ក្នុងឧកាសនោះដែរ ឯកឧត្តមនាយកវិទ្យាស្ថាន បានមានចំណាប់អារម្មណ៍ និងណែនាំដល់និស្សិតទាំងអស់ អោយប្រឹងប្រែងរៀនសូត្រទាំងទ្រឹស្តី និងការអនុវត្តជាក់ស្តែងនៅប្រទេសអ៊ីស្រាអែល និងបង្កើនការយកចិត្តទុកដាក់អោយបានខ្ពស់ ព្រោះថានេះជាឪកាសដ៍ល្អមួយសម្រាប់ប្អូនៗក្នុងការទទួលយកនូវបទពិសោធន៍និងបច្ចេកទេសថ្មីៗនិងទំនើបៗនៅអ៊ីស្រាអែល ដើម្បីពាំនាំយកនូវបទពិសោធន៍ទាំងនោះមកជួយអភិវឌ្ឍន៍ប្រទេសជាតិយើងលើវិស័យកសិកម្មឲ្យកាន់តែជឿនលឿន។
ឯកឧត្តម វេង សាខុន រដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទ បានមានមតិសំណេះសំណាលជាមួយនិស្សិតផ្ទាល់ និងបានកោតសរសើនិងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ ថ្នាក់ដឹកនាំវិទ្យាស្ថានជាតិកសិកម្មព្រែកលៀប ក្នុងការអភិវឌ្ឍន៍ធនធានមនុស្ស តាមរយៈការពង្រឹង និងពង្រីកកិច្ចសហប្រតិបត្តិការយ៉ាងល្អជាមួយដៃគូអភិវឌ្ឍន៍ជាតិនិងអន្តរជាតិ ជាពិសេសជាមួយក្រុមហ៊ុន Sedot Negcv Agriculture Training Center(SNAC) ដែលបានផ្តល់ឪកាសដល់និស្សិតអោយធ្វើកម្មសិក្សានៅអ៊ីស្រាអែល ដើម្បីដកស្រង់ និងផ្លាស់ប្តូរបទពិសោធន៍ទាំងទ្រឹស្តី និងការអនុវត្តន៍។ ឯកឧត្តមរដ្ឋមន្រ្តី ក៍បានចែករំលែកនូវបទពិសោធន៍ផ្ទាល់ខ្លួនរបស់ឯកឧត្តម ទាំងការសិក្សា ការងារជាមន្រ្តីរាជការ និងជាអ្នកដឹកនាំដល់និស្សិតផងដែរ។ ឯកឧត្តមរដ្ឋមន្រ្តី បានផ្តល់អនុសាសន៍ដល់និស្សិត អោយខិតខំរៀនសូត្រនូវចំណេះដឹងនិងបច្ចេកទេសថ្មីៗ ដើម្បីរួមគ្នាគិតគូដោះស្រាយរាល់បញ្ហាដែលកសិករយើងកំពុង ប្រឈម អោយទាន់ពេលវេលា និងមានប្រសិទ្ធភាពឆ្ពោះទៅធ្វើការអភិវឌ្ឍន៍វិស័យកសិកម្មកម្ពុជាជាជំហានៗប្រកប ដោយចីរភាព និរន្តភាព មានលក្ខណៈប្រគួតប្រជែង បរិយាប័ន្ន ធន់និងការប្រែប្រួលអាកាសធាតុ និងនវានុវត្តន៍។
យោងតាមរបាយការណ៍របស់ ឯកឧត្តមបណ្ឌិត ធន់ វឌ្ឍនា នាយកវិទ្យាស្ថានជាតិកសិកម្មព្រែកលៀប បានគូសបញ្ជាក់ថា! ការធ្វើកិច្ចសហប្រតិបត្តិការជាមួយក្រុមហ៊ុន SNAC ដើម្បីលើកំពស់ធន់ធានមនុស្ស ទាំងសមត្ថភាពទ្រឹស្តី និងសមត្ថភាពការងារអនុវត្តន៍ជាក់ស្តែងដល់និស្សិតឆ្នាំទី២ សម្រាប់រយៈពេល១១ខែនៅប្រទេស អ៊ីស្រាអែល លើមុខវិជ្ជាមួយចំនួនរួមមាន៖
១. ស្តង់ដាកសិកម្មអន្តរជាតិ
២. សេដ្ឋកិច្ចកសិកម្ម
៣. ការការពារដំណាំ
៤. គម្រោងស្រាវជ្រាវ
៥. ការអភិរក្សធន់ធានដី​
៦. មូលដ្ឋានគ្រឹះប្រព័ន្ធស្រោចស្រពបែបទំនើប
៧. បច្ចេកទេសក្រោយប្រមូលផល
៨. ការធ្វើកសិកម្មឈើហូបផ្លែ
៩. និរន្តរភាពកសិកម្ម ។ល។
ចំណែកជំនាញដែលត្រូវអនុវត្តក្នុងកសិដ្ឋានរួមមាន៖
១. ការចិញ្ចឹមសត្វ
២. សាកវប្បកម្ម
៣. ការប្រមូលផល និងការវេចខ្ចប់
៤. ដំណាំផ្ការ
៥. ការបណ្តុះផ្សិត​
៦. គ្រាប់ពូជជាដើម។ល។
សូមបញ្ជាក់ជូនថា ប្អូនៗនិស្សិតនិងត្រូវចេញដំណើរទៅប្រទេសអ៊ីស្រាអែលជាបន្តបន្ទាប់
ចាប់ពីថ្ងៃទី១៤ ខែធ្នូ ឆ្នាំ២០២១នេះតទៅ៕

មជ្ឈមណ្ឌលស្រាវជ្រាវកសិកម្មកម្ពុជា-ជប៉ុន បានចុះហត្ថលេខាលើកិច្ចព្រមព្រៀង សម្រាប់ការអភិវឌ្ឍន៍ដំណាំចេកពូជ ក្រូសមីឈេលជប៉ុន(ចេកម្យ៉ាងរបស់ជប៉ុនមានទិន្នផលខ្ពស់) និងដំណាំស្រូវជប៉ុន រវាងក្រុមហ៊ុនអាហ្រ្គីអន ខេមបូឌា និងក្រុមហ៊ុន ស៊ីបា ឌីវីឡុបម៉ិន។ ពិធីចុះអនុសារណៈនេះ ប្រព្រឹត្តឡើង នាថ្ងៃទី២២ ខែតុលា ឆ្នាំ២០២១ ក្រោមអធិបតីភាព ឯកឧត្តមបណ្ឌិត ធន់ វឌ្ឍនា នាយកវិទ្យាស្ថានជាតិកសិកម្មព្រែកលៀប និងលោក​ ស៊ីបាសូជី(Mr. SHIBA SHOJI) ប្រធានក្រុមហ៊ុន ស៊ីបា ឌីវីឡុបម៉ិន។
​ឯកឧត្តមបណ្ឌិត ធន់ វឌ្ឍនា បានថ្លែងថា ! ពាក់ព័ន្ធការដាំដុះដំណាំនៅប្រទេស កម្ពុជា គឺយើងផ្តោតលើការដាំដុះកសិផល កសិកម្មណាដែលមានតម្លៃខ្ពស់ បើទោះ បីយើងកំពុងសិក្សា ឬជជែកគ្នាអំពីការ ធ្វើពិពាធកម្ម កសិកម្មច្រើនប្រភេទ ច្រើនយ៉ាងណាក៍ដោយ យើងជ្រើសយកផលិតផលណាដែលមានតម្លៃខ្ពស់ បើទោះ ជាការដាំដុះដូចជា៖ ដំណាំស្រូវវាជាដំណាំដាំដុះទូទៅរបស់ប្រជាពលរដ្ឋខ្មែរ ប៉ុន្តែវាជាការដាំដុះមួយ ដែលពេលខ្លះប្រជាកសិករ ខាតបង់ព្រោះដំណាំនេះ ហើយការដាំដុះនេះនៅទាមទាការធ្វើអោយប្រសើឡើង។
ឯកឧត្តមបណ្ឌិតបានបញ្ជាក់បន្ថែមទៀតថា ! ជាទូទៅកសិផល ផលិតផលកសិកម្មរបស់ជប៉ុន តែងតែជាផលិតផលដែលមានតម្លៃខ្ពស់ ឧទាហរណ៍ពេលខ្លះក៍មានការដេញថ្លៃលើផលិតផលកសិកម្ម ដូចជាផ្លែស្តូប៊ើរី ជាដើមពេលខ្លះការដេញថ្លៃសម្រាប់ផ្លែស្តូប៊ើរី១ផ្លែមានតម្លៃរហូតដល់$500 នេះបញ្ជាក់អោយឃើញ ពីគុណភាពកសិផលនិងតម្លៃរបស់វា ហេតុដូចនេះហើយយើងចង់ធ្វើការលើវិស័យកសិកម្មជាមួយជនជាតិជប៉ុន។
ឯកឧត្តម នាយកវិទ្យាស្ថានបានសង្ឃឹមថា ដំណាំចេកក្រូសមីឈេលជប៉ុន និងដំណាំស្រូវជប៉ុន នឹងមានការដាំដុះពេញផ្ទៃប្រទេសកម្ពុជាយើង ហើយកម្ពុជាអាចផលិត និងផ្គត់ផ្គង់នាំចេញទៅទីផ្សារខាងក្រៅប្រទេសផងដែរ។
លោក ស៊ីបា​ សូជី(Shiba Shoji) ប្រធានក្រុមហ៊ុន ស៊ីបា ឌីវីឡុបមិន​ បានគូសបញ្ជាក់ថា ការវិនិយោគក្នុងវិស័យកសិកម្ម និងឧស្សាហកម្មនៅកម្ពុជា ដែលក្រុមហ៊ុនអាហ្រ្គីអន ខេមបូឌា និងមជ្ឈមណ្ឌលស្រាវជ្រាវកម្ពុជា-ជប៉ុន បានធ្វើការស្រាវជ្រាវ និងពង្រីកការដាំដុះ ដំណាំចេក និងស្រូវឲ្យបានទូលំទូលាយនៅប្រទេសកម្ពុជា ហើយនឹងធ្វើការនាំចេញទៅកាន់ទីផ្សាពិភពលោក។
លោក ស៊ីបា សូជី បានបញ្ជាក់បន្ថែមទៀតថា! ការដាំដុះដំណាំចេកពូជក្រូសមីឈេល(Cros Michel) ត្រូវបានចាប់ផ្តើមតាំងពី៣ឆ្នាំមុនដែលត្រូវបានអនុញ្ញាតដោយរាជរដ្ឋាភិបាលជប៉ុន ដើម្បីនាំយកចេកពូជ ក្រូសមីឈេល នេះមកវិទ្យាស្ថានជាតិកសិកម្មព្រែកលៀប ហើយបានដាំដុះ និងពិសោធន៍សាល្បងលើការលូតលាស់របស់ដំណាំចេក។ ដោយមានការគាំទ្រពី ឯកឧត្តមនាយកវិទ្យាស្ថានជាតិកសិម្មព្រែកលៀប បានចាប់ផ្តើមធ្វើការពិសោធន៍លើដំណាំចេកប្រភេទនេះដោយទទួលបានលទ្ធផលល្អរយៈ៣ឆ្នាំកន្លងមកហើយ ហើយចាប់ពីពេលនេះតទៅនិងធ្វើការសហការជាមួយក្រុមហ៊ុន អាហ្គ្រីអន ដើម្បីធ្វើការបន្តដាំដុះដំណាំចេកនេះជាលក្ខណៈទ្រង់ទ្រាយធំសម្រាប់តម្រូវការទីផ្សា។
ដោយឡែកដំណាំស្រូវជប៉ុន ដោយមានការគាំទ្រពីឯកឧត្តមនាយកវិទ្យាស្ថានជាតិកសិកម្មព្រែកលៀប បានធ្វើការពិសោធន៍ទៅលើការដាំដុះដំណាំ ស្រូវជប៉ុន ក្នុងមួយឆ្នាំចំនួន២ដង និងបានសាកល្បងដាំដុះនៅតាមបណ្តាខេត្តមួយចំនួនដូចជា៖ ខេត្តបាត់ដំបង, ព្រៃវែង, កំពង់ចាម, កំពត, កំពង់ធំ និងខេត្តពោធិ៍សាត់ជាដើម ហើយទទួលបានជោគជ័យដោយជ្រើសរើសបាននូវពូជស្រូវជប៉ុនដែលសមស្របសម្រាប់ដាំដុះនៅប្រទេសកម្ពុជា។ ដំណាំស្រូវដែលបានដាំដុះទទួលបានជោគជ័យនៅក្នុងប្រទេសកម្ពុជាយើងមានចំនួន០៤ប្រភេទ ដែលជាពូជល្អបំផុតរបស់ជប៉ុនរួមមាន៖
ទី១ ពូជ ហិតូមេបូរេ(Hitomebore) ទី២ ពូជហិណូហិការិ(Hinohikari) ទី៣ ពូជ អាគីតាកូម៉ាស៊ី(Akitakomashi) ទី៤ ពូជ កូស៊ីហីការិ(Koshihikari)៕

ឯកឧត្តមបណ្ឌិត ធន់ វឌ្ឍនា នាយកវិទ្យាស្ថានជាតិកសិកម្មព្រែកលៀប ឯកឧត្តមបណ្ឌិត​ភិន សុភាព លោកបណ្ឌិត ផេង វុត្ថា នាយករងវិទ្យាស្ថានជាតិកសិកម្មព្រែកលៀប បានស្វាគមន៍ដំណើទស្សនកិច្ចរបស់ ឯកឧត្តមបណ្ឌិត ទូច វិសាលសុខ រដ្ឋលេខាធិការ ក្រសួងអប់រំ យុវតជននិងកីឡា ដែលបានអញ្ជើញមកទស្សនកិច្ចនៅវិទ្យាស្ថានជាតិកសិកម្មព្រែកលៀប កាលពីវេលាម៉ោង ៣រសៀល ថ្ងៃសុក្រ​ទី១៨ ខែមិថុនា ឆ្នាំ២០២១។ ឯកឧត្តមបណ្ឌិត ធន់ វឌ្ឍនា នាយកវិទ្យាស្ថានជាតិ បានណែនាំគណៈប្រតិភូអញ្ជើញទស្សនា សមិទ្ធផលនានាក្នុងវិទ្យាស្ថានជាតិ ដូចជា ៖
១. កសិដ្ឋានចិញ្ចឹមគោយកទឹកដោះ
២. កសិដ្ឋាន Smart Farm ដែលបានពិសោធការចិញ្ចឹមត្រី និងបន្លែ
៣. កសិដ្ឋាន ពិសោធដំណាំចេកអំបូលឿងជប៉ុន
៤. មន្ទីពិសោធបណ្តុះជាលិការុក្ខជាតិ

ឯកឧត្តមបណ្ឌិត ធន់ វឌ្ឍនា នាយកវិទ្យាស្ថានជាតិកសិកម្មព្រែកលៀប បានចុះអនុសារណៈយោគយល់គ្នា ជាមួយ ឯកឧត្តម បណ្ឌិតសភាចារ្យ សុខ ទូច ប្រធានរាជបណ្ឌិតសភាកម្ពុជា កាលពីថ្ងៃទី២២ ខែ​កក្កដា ឆ្នាំ២០២០។
គោលបំណងនៃការចុះអនុសារណៈនេះផ្តោតលើស្រាវជ្រាវរបគគំហើញថ្មីៗ​​ និងផ្លាស់ប្តូរបទពិសោធន៍រវាងគញនាទៅវិញទៅមក។

នៅថ្ងៃទី ១៨ ខែសីហា ឆ្នាំ២០១៤ ឯកឧត្តម​ បណ្ឌិត ធន់ វឌ្ឍនា នាយកវិទ្យាស្ថានជាតិកសិកម្មព្រែកលៀប បានចុះកិច្ចព្រមព្រៀងសហប្រតិបត្តិការជាមួយក្រុមហ៊ុន Axel Asia Human Resources ស្តីអំពីការពិសោធន៍ដំណាំចេកអំបូងលឿងរបស់ជប៉ុន និងបញ្ជូននិស្សិតទៅសិក្សានៅប្រទេសជប៉ុន។

នៅថ្ងៃទី ៣០​ខែសីហា ឆ្នាំ២០១៧ វិទ្យាស្ថានជាតិកសិកម្មព្រែកលៀប បានចុះអនុសារណៈយោគយល់គ្នា ជាមួយក្រុមហ៊ុន Vitrosys Clone Technology Co.LTD ប្រទេសកូរ៉េ ។ គោលបំណងនៃការចុះអនុសារណៈនេះ គឺផ្តោតលើបច្ចេកទេសបណ្តុះជាលិកាវប្បកម្ម(Tissue culture) នៅក្នុងវិទ្យាស្ថានជាតិកសិកម្មព្រែកលៀប។

ថ្ងៃទី២៧ ខែកញ្ញា ឆ្នាំ២០១៧ វិទ្យាស្ថានជាតិកសិកម្មព្រែកលៀប បានបញ្ជូននិស្សិតចំនួន០៩នាក់ និងមន្រ្តីមួយនាក់ ទៅទស្សនកិច្ចសិក្សាចំនួន០៥ខែនៅ Hainan College of Foreign Studies នៃសាធារណៈរដ្ឋប្រជាមានិតចិន។

កាលពីថ្ងៃទី១៧ ខែមិថុនា ឆ្នាំ២០១៧និ ស្សិតនៃវិទ្យាស្ថានជាតិកសិកម្មព្រែកលៀបចំនួន១៤នាក់ បានទៅទស្សនកិច្ចសិក្សានៅ សាកលវិទ្យាល័យ Rajamangala Isan ខេត្តសុរិន ប្រទេសថៃ ដើម្បីផ្លាស់ប្តូរបទពិសោធន៍រវាងគ្នាទៅវិញទៅមក។